Date: 04 March 2012

Aung San Suu Kyi Mandalay Tlawnnak

Zaukphung thlennak hruaitu Aung San Suu Kyi cu Kawlram laifang Mandalay khuapi ah March 6 kha vanlawng in a phan, Yatanapone Vanlawng bualrawn in biachimnak hmun Aungpinlay bualrual tiang mipi nih hlunghlai taktak in an rak don. Ruah siamsiam tein a sur nain minung a thong le a sing nih a rak don. 1988 hnu Aung San Suu Kyi khual tlawnnak ah minung tambik an chuah a si.

Aung San Suu Kyi Mandalay Khua Chung Ah A Luh Lio

Aung San Suu Kyi Biachim Lio

Mipi tel loin zeihmanh tuah khawh a si lo, cucaah mipi nawl kan duhmi hna cu kan ram ah upadi humhimnak a si. Upadi humhimnak a um ahcun ahohmanh nih mipi kha duh poah in an in tuah ngam hna lai lo. Upadi timi cu ramkhletu ca lawngah a si lo,  cozah riantuan, lothlo le mipi vialte ca zongah a si dih. Mipi lungthin ah humhimnak a um lawng mipi nih luat tein khua nan ruat kho lai i, luat tein riantuan khawh a si lai, cucaah zaukphung timi cu mipi nawlngeihnak a si caah NLD nih mipi caah rian kan tuan khawhnak dingah caan karlak thimnak ah thimfung nan kan pek nak lai zangfah kan nawl hna,” tiah a chim.

Aung San Suu Kyi Biachimnak Hmun Ah Mipi Siangkhar Renglo An Chuak

Aung San Suu Kyi cu a khualtlawnnak ah a bat deuh caah vanlawng chungah voithum a luak nain dinh duh loin biachimnak hmun tiang motor cungah a dir i a dongtu mipi kha upat hmaizahnak a pek hna. Vanlawng bualrawn in biachimnak hmun tiang suimilam pakhat kal a si mi kha a dongtu minung an tam tuk caah suimilam  4 a rau.

Biachimnak hmun a phak ahcun minung a sing in an rak chuak. An i lawm tuk ah an tli an le, an ttap, an i hlok i an laam. Minute 15 tluk bia a chim ah a tha a bat deuh caah U Win Tin nih biachim a chan, caan tlawmte a rauh ah Aung San Suu Kyi nih biachim a peh than.

Minung An Tam Tuk Ah Rili Pi Bang Suangdut In

Aung San Suu Kyi nih “mipi thazang timi hi hman thiam a herh, hman thiam lo ahcun ttih a nung, cucaah hmante le fel tein mipi thazang hi kan hman a herh,” tiah a chim.

Aung San Suu Kyi Sagaing Tlawnnak

Madalay ah Election Campaign tluang tein a tuah dih hnu ah Sagaing khua ah a kal. Sagaing  hlei in mipi nih a thongthong in an rak don. Mandalay in Sagaing karlak ah minung a thongthong nih lam thluamtluang in an rak don. Zaycho dawr tluan a phak ah mipi nih an but tuk caah saulak te a rau. 

Mandalay In Sagaing Lei Ah

Mipi lungthin mah tluk in a la khomi kan Kawlram i a chuah cu kan van a ttha, Kawlram tuanbia lawng si loin vawlei pumpi tuanbia tialtu zong a si. 1988 lio in Kawlram ah zaukphung kan duh tiah au hram a rak i thawk, asinain uktu thalo  ruangah kum 23 renglo a rau. Kawlram zaukphung dothlennak aa thawk hnu ah aa tlengmi, nichuah Europe ram vialte, Arab ram cheukhat hna cu Kawlram hmailei ah an tli dih cang. Kan ram ah thlennak taktak le a dikmi pyithawngsuh ram kan ser khawhnak ah kanmah le kan ti khawh tawk cio in ttang cio hna usih.

 

Aung San Suu Kyi Biachim Lio

Mandalay le Sagaing hrawng ahcun phungki pawl hi cozah dotu ah ahcun thazang ngei bik an si. Tutan Mandalay le Sagaing ramthen zongah phungki pawl a ttang taktak ti hmuh khawh a si. Mandalay khua i Masuyin phungki sianginn cu cozah dohdalnak ah minthang bik an si.

Leknak Bualrawn ah cozah lei nih biachimnak nawl an pek duh hna lo caah Ayerawaddy tiva kam setpho cunggah Aung San Suu Kyi nih bia a chimh hna. Mah bantuk tete zong hi tuanbia ah a tang dingmi an si. Aung San Suu Kyi umnak le kalnak hmun poah ah a zul dingmi mipi.

Tlawmte kan chim kan relmi le kan ttialmi thawng in mi zeimaw nih zaukphung tlaihchannak lungthin le ram dawtnak lungthin an ngeih ahcun cucu kan saduhthah a tlinnak a si.

Careltu le hmanthlak zohtu nan dihlak cungah ka lawm. Ttial sualmi le palh sualm um ai kun, ka ngaithiam u.

Upatnak le siaherhnak he,

Salai Lairamthang

[ Sungsung pa]

Washington D.C

USA

Date: 18 February 2012

Biahmaithi

Atu lio kan ram cu zaukphung tlennak lamthluan cungah kan kal cuahmah lio a si, rianrang tein thlen a duhmi an um, thlen a duh lomi zong an um tthiamtthiam. Zaukphung ahcun kan ruahnak a khah lomi zawn ah pakhat le pakhat upat zia kan thiam tu a herh hringhren. Duh poah in chim, duh poah in ttial, duh poah in um kha zaukphung a si lo, zaukphung timi cu midang upat le midang hnursuang lo tein chim, tial le nun kha a si.

Aung San Suu Kyi nih Election Campaign a tuahnak hmun paoh ah a chimmi cu, ” kan ram ah upadi nih lai a rel a herh, upadi cungah a hohmanh um lo ding, hriamnam tlaimi hna he daihnak kan ser a herh, kan ram a daih lawngah kan ram a thangcho lai, kan ram mipi nih ngamdamnak a herh, kan ngam a dam lawngah kan ram thanchonnak caah rian kan ttuan kho lai. Fimthiamnak biatak tein tha kan pek a herh, fimthiamnak tel loin kan ram a thangcho kho lai lo, kan ram cu Pyithawngsuh Ram a si, Kawlmi zong ttanzinta phun khatkan si, minung tam deuhmi miphun kan si ca caah Pyithawngsuh Lungput a hlei in ngeih kan herh “tiah a kalnak kip ah a chim.

Tuzarh chungah Aung San Suu Kyi Rangoon khuachung Mayangone ah NLD zung a on, Hleku le Phiapung ah Election Campaign a tuah. Minung a thongthong nih a rak don. Ralkap cozah nih kum 23 renglo tadinca, radio, tv, mekazin, Journal tibantuk in a phunphun thangchiatnak an tuah nain miphun lungput an thleng kho hlei lo. Ralkap cozah nih fak deuh in an soi ah mipi nih fak deuh in an uar ti awk in a um. Atu lio cozah nih thianghlim tein caan karlak thimnak an tuah ahcun NLD nih tam deuh cu a tei hrimhrim lai tiah an zumh. Asinain USDP party nih fawi tein an zia an tthin lai lo a timi zong a um.

Mayankkung NLD Zung Onnak

Rangoon khua Mayankung Myone in NLD aiawh in MP a cuh dingmi cu Mon miphun a si i, Dr.Daw May Win Myint a si. Daw May Win Mint cu Aung San Suu Kyi orhlei kap hi a dihmi [ mit-hman a benhmi] khi a si.

Aung San Suu Kyi nih zung onnak puai ah bia chim lio a si. A tanglei hmanthlak cu U Tin Oo bia a chim lio. A tanlei i link ka thilmi te khi hmet ulaw Aung San Suu Kyi Biachim lio zoh khawh a si.

Aung San Suu Kyi Hleku Tlawnnak

Hleku khua cu Rangoon in meng tlawmte lawng a hlatmi a si caah lehlang in a kal. Hleku Myone MP caah NLD aiawh in a cuh dingmi cu U Pyo Min Thein a si, amah i 88 chanchuak Sianghkleiruan siangngakchia hruaitu a rak si. 2010 thimnak ah khan ramkhel party a dirh nain ralkap cozah nih tuahmi thimnak kha a dik lai ti a zumh lo caah party in a chuak i, NLD ah a lut. U Pho Min Thein nih, “Aung San Suu Kyi hruainak tangah lungrual tein rian kan tuantti a biapi deuh,” tiah a chim.

Hleku Khua Ah Hlunghlai Taktak In An Don Lio

 

Chun nilin saling a si nain an duhnak nih a tei hna, nilinh zong an tuar khawh, Aung San Suu Kyi hmuh cu an chanchung caah an philh khawh lo dingmi a si. Kawlram tlennak tuanbia ah a cang ding a si caah ngakchia in upa tiang an rak chuak. Aung San Suu Kyi biachim cu a ngeih an cim hrimhrim lo.. A tanglei te hi rak hmet ulaw, Aung San Suu Kyi biachim mi video in zoh khawh a si.

Aung San Suu Kyi Phiapung Tlawnnak

Irrawaddy ramthen Phiapung khua ah Election Campaign tuah ding in lehlang in a kal than. NLD zung onnak zong a tuah. Lentecelhnak lei vuanci nih leknak bualrawn hman a sianh hna lo caah NLD zungah tlawmpal biachimnak a ngeih hna hnu ah setpho ah mipi a kalpi hna i biachimnak a ngei hna. Phiapung khua aiawh in MP a cuh dingmi cu U Thein Shwe a si. U Thein Shwe cu Aung San Suu Kyi himnak caah caan saupi rian a tuanmi a si. Kum 23 chung NLD ah zumh awktlak tein a dirmi, thong zong a tlami a si. A tanglei te hi rak hmet ulaw, Aung San Suu Kyi biachim mi video in zoh khawha si.

Aung San Suu Kyi Pathein le Myangmya Tlawnnak

Date: 08 February 2012

Kawlram Zaukphung tlennak hruaitu le NLD hotu Aung San Suu Kyi le U Tin Oo cu Irrawaddy ramthen Pathein khua le Myangmya khua ah a lang in Election Campaign tuah ah a tlawng. An phaknak khuakip ah minung a thongthong nih an rak don hna. Aung San Suu Kyi nih Election Campaign a voihnihnak a kal a si.

Pathein Khua A Luh Ka Ah Pathein Nithawng He An Rak Don 

Pathein nithawng cu kan no lio tein kan rak hngalh i Kawlram ah cun minthang a si. An dawtmi hna cu Pathein nithawng laksawng kha pek tawn a si.

  

1989 kum ah Pathein khua cu voikhat a rak phan, atu a phak hi a voihnihnak a si. Ralkap cozah nih 1989 hnu in khual tlawn an onh ti lo caah a inn chungah an rak hren.

Pathein Khua Mipi Sin Ah Biachim Lio

 Pathein khua 20 chungah a voikhatnak a phak a si. Pathein khua ah hin Karen miphun zong tampi an um. Karen miphun tam ialte nih an rak don caah a lawmnak kha biahmaithi ah a chim hmasa. Kawlram cu miphun tampi he dirhmi ram a si” tiah a ti.

Atu lio hi Kawlram thlennak zeimawzat a um caah ramdang in khualtlawng mi tampi an lut, mi tam deuh cu Aung San Suu Kyi hmuh duh ah a rami an tam. Hmanthlatu, catialthiam pawl, pawngkam le thingram zoh duhmi pawl le caan karlak thimnak hlathlai duh ah a rami an si.

Aung San Suu Kyi nih a chimmi cheukhat cu, “Phung timi cu mipi himnak caah sermi a si, mipi ttemttawntu caah sermi a si lo, mipi nih ngamdamnak an hmuh khawhnak dingah rian fakpi in kan tuan a herh, kan ram fimthiamnak tha deuh in kan ser a herh, mah vialte kan tuah khawh nak dingah mipi nih thazang tel loin tuah khawh a si lo. Mipi nih nan duhmi nan tuan khawhnak dingah nanmah nih nan duhmi aiawhtu nan thim a herh. Mah lawng si loin mipi caah rian a tuan kho dingmi bu zong thazang nan pek a herh. Cucaah caan karlak thimnak ah mipi nih thimfung nan thlak a herh. Thimfung nan thlak tik zongah nan thimfung a tlawt tlau lonak dingah nan i rarin zong a herh tiah a chim.

 

NLD thantaar le NLD logo lawngte in a khat. Caan karlak thimnak ah USDP nih hlankan thimfung in teinnak an hmuhmi kha tutan cu hlankan thimfung kongah biatak tein NLD nih an i ralrin dingmi a si. Thimfung thlatu hna le thimfung vengtu hna le kha trainning thatein kan pek hna an ti.

1988 lio khan kan ram hi a tleng ding a si nain ralkap le NLD karlak ah itheihthiamnak a um lo caah kum 23 renglo kan rauh hnu ah zalonnak zeimawzat kan hmuh mi a si. Mah kan hmuh khawhnak dingah temtuartu hna nih tem innak thawng in a si. 1990 kum NLD nih thimnak i an tei ka ah khan NLD Vice Chairman U Kyi Maung nih Kawlram ahcun nurenburg bantuk tazacuainak tuah kan herh lem lai lo” tiah a chim sual i, mah cu ralkap bawi vialte nih an ttih caah NLD hruaitu vialte cu thongah an thlak dih hna. 

 Minung thong 50 renglo nih pupululh chuihnak bualrawn ah a biachim an ngaih lio, rak chuak hlah ulaw tiah tlangau zongah tlauh khawh ding phun an si lo, lungthin chung in a chuakmi cu ahohmanh nih an kham kho hna lai lo.

 

Sianghleirun Siangngakchia pawl nih mipi humhimnak tuanvo an laak lio a si. Ram pakhat thlennak ah hruaitu hna nih an i palh sual ahcun a hram in thawk than a herh” ti a si. Hruaitu tlawmte nih palhnak ruangah mipi a thongthong in kan sung. Nunnak kan sung, thisen kan sung. Hruaitu tha cu rampi nih a herh bikmi a si. 

Mipi thawnnak cu hruaitu hna nih an ttih bikmi le an herh bikmi a si. Mipi nih dirkamhmi hruaitu hna cu cikkhat an tlak hmanh ah mipi nih an thawh than hna lai. Mipi tel loin mipi caah riantuan khawh a si lo. Mipi caah mipi he lawng tuan khawh a si.

 

A tanglei hmanthlak hi Myangmya khua ah Aung San Suu Kyi Nih bia a chim lio a si. Myangmya khua ah Karem tampi an um, Khrihfa tampi zong an um, Sevenday Adventist Bible Sianginn te hna a umnak hmun a si i, Khrihfa zeimawzat an umnak a si caah thilcinnak lei le thingram kong an cawmnak sianginn umnak hmun zong a si fawn.

 

 Zung Cer Mawi [ Thet Mon Myint] Nih Academy Laksawng A Hmuh

2010 Kawlram Academy Lakawng peknak cu Nyepyidaw Khuapi ah an tuah i, ramhun changtu Dr. Sai Mouk Kham le vuanci pawl an i tel. Pu Kyaw San nih laksawng a pek hna. Chin miphun chungah Zung Cei Mawi nih a pakhatnak laksanwg a hmuh i Chin miphun caah tuanbia a ttial.

 

 Pumrua that zongah Kawl ngaknu nih an tluk hrimhrim lo.

Lai thil a hrukmi hrimhrim nih a dawhter. Hlan tein Laimi sinak hi rak uar sehlaw atu nak in a min a thang deuh lai. Kawl nih Chin an ti tthiamtthiam, Chin mi zong nih Lai nute kan ti tthaimthiam.

 

Mah le miphun a uar, mah le miphun a tlaihchan cu kan miphun himnak caah a biapi bik a si. Miphundang uar le miphundang tlaihchan cu kan miphun tlaunak a hrama tawknak a si.

 Laimi hi miphun tenau kan si lonak cu kan thilthuam le kan kutzung in hmuh khawh a si. Miphun tetuai hna nih mah bantuk thilthuam le kutzung ngeih khawh ding a si lo, Laimi hi kan semnak hrimhrim in miphun pipuan kan si, atu bel ah mah miphun zeirel lonak nih kan miphun kha miphun tetuai ah a chuahter a zelh hnik.

A Tanglei Baisakup in Academy A Hmuhmi

 Careltu, hmanthlak zohtu nan dihlak cungah ka lawm. Zung Cer Mawi lawmh pinak he ka van tlahmi a si. 

Mah vial in sirh seh, 

Upatnak he,

Salai Lairamthang

Washington D.C, USA

 

Date: 07 February 2012

Myanmar Motion Picture Academy Awards Giving Ceremony for Year 2010 was held on Feb 7, 2012 in Nay Pyi Daw, Myanmar.

Here are the Winners of Myanmar Motion Picture Academy Awards for Year 2010;

  1. The Best Lead Actor Award = Pyay Ti Oo (Adam, Eve and Datsa)
  2. The Best Lead Actress Award = Thet Mon Myint (Adam, Eve and Datsa)
  3. The Best Supporting Actor Award = Wai Lu Kyaw (Red Sun Above Sea)
  4. The Best Supporting Actress Award = Hwar Hwar Aung (A May Kyae Zuu Sat Phu Chin Tae)
  5. The Best Director Award = Khin Maung Oo and Soe Thein Htut (Red Sun Above Sea)
  6. The Best Cinematography Award = Pan Chi Soe Moe (Red Sun Above Sea)
  7. The Best Editing Award = Myint Khine (Red Sun Above Sea)
  8. The Best Music Award = Myanmar Pyi Kyaut Sein
  9. The Best Screenplay Award = Khin Maung Oo and Soe Thein Htut (Red Sun Above Sea)
  10. The Best Picture/ Film Award = Adam, Eve and Datsa

Ref: http://www.myanmarcelebrity.com/

 

Kan Ram le Kan Miphun Thawngpang

Tuchun cu Mandalay ah Aung San Suu a tlawng lai i, thawngpang le hmanthlak kan kuat hna lai ka ti nain NLD nih biachimnak hmunhma rem an hmuh lo caah a khual tlawnnak cu an let. Mandalay mipi tamtuk chuah dawh an si caah Bah Thu bualrawn an hlan nain Election Commision le Myanmar Football Federation nih an zenh ziar caah an letnak a si.

UN Human Right Palai Thomas Ojea Quintana cu Kawlram a rak tlawng i Kawlram cozah lei upa hna he tonnak an ngeih hnu ah Rangoon khua ah Aung San Suu Kyi le 88 chan chuak hruaitu hna he tonnak an ngei. Kawl cozah nih US palai Thomas Quintana cu an ttih bikmi a si. UN nih Kawl cozah hruaitu hna an sualnak kawl i tazacuai cu an ttih bikmi a si. Insein thong ah a kal i, ramrian tuan rungah thongtla zeimawzat a ton hna. UN a phak  than tikah Kawlram a tlawnnak report a pek te lai. Aung San Suu Kyi he Aung San Suu Kyi inn ah thawngzamhnak an tuah.

CNF le Kan Miphun Cheukhat Ruahnak

CNF nih Tedim peng zung on dingah cozah he lungtlinnnak an ngeihmi kongah Tedim lei mi cheukhat nih an duh lo caah meting an tuah i, Nyepyidaw tiang an duh lonak langhter an timh mi kongah mi cheukhat lung tha lo in um a si.  

Keimah ruahnak ahcun cozah nih minsen a thut cangmi cu an hrawk lai lo. CNF nih an duh le zung on lo in um khawh a si. Tedim lei upa cheukaht a duh lomi nih CNF tu kha an chimh ding hna si tiah ka ruah. Ne Win chan in Kawl cozah nih uico saruh pawlasi kha Laimi cungah hriam tha ngai in a hman. Mah cu Laimi cheukhat nih kan hngal lo, kan ral taktak doh loin kanmah le kanmah kan i do, kanmah le kanmah kan i seh. Cucu Kawl cozah a lawmh bikmi a si.

Mah lio caan ah CNF nih mipi he ton biaruahnak felfai tein tuah a herh. Tuah zong a tuah lai tiah ka zumh. Tedim lei mipi tamdeuh nih an duh lo ahcun zung chiah lo ah a tha bik. Laimi khoika peng kan si hmanh ah CNF nih Laimi zapi aiawh in dothlennak an tuah. Laimi zapi caah rian a tuan. CNF cungah lawmhnak bia tu kan chim ding a si. Laimi dihlak caah kum 20 renglo an nunnak tampi le thisen tampi an pek cang. CNF cung ah kan lung a lawmh lo hmanh ah kan doh ding hna a si lo. Chin mi caah dothlennak an tuah lomi hna nih CNF cungah lunglawmhnak biachim kan daithlang deuh rua.

Aung San Suu Kyi le Thomas Quintana Thawngzamhnak

Kawlram White House cu Aung San Suu Kyi inn a si ti usih law kan palh lem lai lo. Vawleicung ram kip in hruaitu hna Kawlram an tlawm an pal ta zungzal mi a si. Kawlram zaukphung lennak hmelchunhnak pakhat ah a cang dingmi a si. Kawlram chan tuanbia ah a hmun zungzal dingmi hmun zong a si. Mah inn hi Daw Khin Kyi nih Aung San Suu Kyi a roh taakmi a si nain Aung San Oo nih a cuh i, taza a cuai. Atu tiang tazacuainak a dih rih lo. Aung San Oo cu ramdang mi sinak a laak cang caah Kawlram ah tthial khawhmi thilri ngeihnak nawl a ngei ti lo, asinain a angeihmi cu midang sin ah a hlut khawhnak nawl a ngei.

Kum 20 chungah thawnglatu hna luatte le zalong tein thawng an laak khawh cu Aung San Suu Kyi le Thein Sein tonnak an ngeih hnu lawng in a si. Nyepyidaw ah MP pawl meting an tuah lio a si i, media he a pehtlaimi phung ser an timh lio a si. Mah an ser khawh ahcun censor board cu hrawh a si cang lai.

Aung San Suu Kyi biahal mi a leh lio, Thomas Quintana cu Kawlram ah voinganak a rat a si. Kawlram kongah chun amah tluk in felfai tein a dothlat mi an um lai lo.

Aung San Suu Kyi le England palai cu Pakhuku le Myaing peng khuate lei ah NGO bawmnak in thanchonnak tuah an timhmi va zoh dingah aho hmanh thawngthanh hmasa loin vanlawng in an kal, Ngaungoo vanlawngbual ah an tum. Mipi nih an rat thawngpang zeitindek an theih i an rak don hna. England Palai pa cu mipi nih Aung San Suu Kyi an uarning a hmuh ah a khuaruah a har tiah an chim.

Nguangoo Vanlawngbual ah an tum, vawleicung vanlawng lak ah a chia pawl a si men lai, mah bantuk vanlawng in khualtlawn cu a caah  tihnung a si. Zeitluk in kan ram a sifah ti cu vanlawng zoh in hmuh khawh colh a si.

 

Tu zanlei cu Kawlram in Zarganar a phan i, kan umnak pawng te ah biachim a tim i, kei zong kal ka tim. A bia ka va ngai lai. Kachin nu Daw Boh Cia le NLD in nu pakhat he an phan i, biachimnak le thawngzamhnak an tuah lai ti a si. Timh tuah ka duh ve cang caah mah vial in ka hngol rih lai. Tuchun cu tlamtling lo pi in ka van thlah, thawngpang thar tete a um ahcun pehzulh khawh ka van i zuam te lai.

Careltu le hmanthlak zohtu dihlak nan cungah ka lawm. Kan pal sualmi a um ahcun a ruahzia kan thiam hram u.

 

Upatnak he,

Salai Lairamthang

( Sungsung  pa )

Washington D.C

USA

Leave a Reply

Your email address will not be published. Required fields are marked *

*